LA BATANA GEMELA DE BARLETTA (bellissima storia raccontata da un profugo fiumano a Barletta)

di Fulvio Frezza

Come che gò scrito, la Batana FM 341 la era stada fata dal padre nel nostro fondo de Calle dei Facchini 9 e la era tuta pareciada cola vela che se te ciapa la bora quando che ti son fora - Dio ne guardi - ti se pol salvar solo cola vela e pogiando verso Cantrida. Guai ciapar el vento più streti metendo la prova sula Lanterna: al primo refolo la batana - cola colomba che la gaveva e col timon grando che gavevimo, che anca lui fazeva de colomba - la se gaveria ribaltado e alora sì che bisognava zigar "caffè" come nel giogo de Citavecia "zucaro-cafè" quando che ti se arendevi.
El padre ciapava el vento a tre quarti de gran lasco e così imbarcavimo meno aqua e quando che arivava el refolo lui lo vedeva sul mar e el pogiava ancora de più col timon. El padre el me dava sicureza: el tegniva la scota cola destra e la man sinistra sula argola del timon.
Per fortuna la mura la era regolada che la vela la fussi ben tesada in modo de far scampar fora el vento e la barca la rispondeva perfetamente ale manovre, ma lo stesso imbarcavimo mar che el sprizava dal fianco.
Mi ghe zigavo "Papà gò paura" e lui che taso. "Metise in zinocion e tiense con una man sul schermo e buta fora la aqua cola sessola" el zigava calmo lui.
E così arivavimo a Cantrida, amainavimo la vela e voga coi remi per tornar a casa imprecando el vento che ne gaveva fato scampar via. Ne era sucesso più volte.
La vela de coton la gaveva avudo un sbrego e el padre la la gaveva repezzà, che così sembrava come un numero I e noi cantavimo: "La vela numero uno, non la batte più nessuno".
La barca la era piturada de zenerin perché da noi in Porto era molta nafta e le barche le se sporcava fazile e così el sporco el se vedeva de meno.
Quando che finalmente el Padre gà ottenù dopo de due ricorsi al Consolato de Capodistria la opzion per l’ Italia, la FM 341 la xe restada là, forsi venduda de scondon a qualchedun.
El mio Vecio, de Udine smistamento, i lo ga mandà al Campo Profughi a Barletta, città de mar, e dopo de gaver domandà el permesso al Direttor del Campo, el gà comprado el material e el gà fato la gemela.
Lui el gaveva tute le misure intela sua testa e così la batana fiumana de 3 metri e ottanta la gà rivisto la luce col suo drito de prova, el specio de pupa, el tambucio, i due bancheti per sentarse, le rasme, le corbe, i madieri, i remi coi schermi e coi stropi, i pajoi e lui el te la gaveva piturado in stesso modo col zenerin e el ghe gaveva dado sul fondo el blak nero.
E anca la vela el ghe la gaveva fatto, cola scazza per la colomba, el albero e el timon cola argola, che così mi andavo a bordisar.
Propio un giorno che bordisavo con un mio amico - el grando imprenditor vinicolo Italo Folonari de Brescia, conossudo in tuto el mondo per i sui vini - i te me ciama de tera e xe i pompieri: "Che cossa i vol" ghe domando, e lori "Volemo solo la barca coi remi, e el paron che el vegni con noi" e che questo xe un ordine.
Detto e fatto, i imbarca barca, remi e mi su un camion e via con lori sul fiume Ofanto e là scominziemo a … pescar.
Più che un fiume, el Ofanto el sembrava un torente perchè el gaveva diverse seche e busi, che quando che stavo in aqua navigabile la barca la stava ferma o apena apena la se moveva, e quando che entravo nele seche te era maledeti vortisi e corente che fazevo fatica a remar per non esser portado via.
Mi ero sui remi e con mi in piedi sul tambucio de pupa, un pompier che el te butava una strana rede che vedevo per la prima volta: el mato la tegniva involtizada sula man e quando che la butava, la rede la ghe se apriva a ombrela per una largheza de un tre forsi quatro metri.
Dopo una mesa ora de tentativi, el pompier el gà ciapà quel che el zercava e lo gavemo portado sula riva. Era un povero putel de 14 anni che el maledeto gorgo del Ofanto lo gaveva fregado.